Translations:Srosh Yasht/45/en

26.

𐬀𐬜𐬀⸱𐬥𐬋⸱𐬙𐬏𐬨⸱ 𐬯𐬭𐬀𐬊𐬴𐬀⸱ 𐬀𐬴𐬌𐬌𐬀⸱ 𐬵𐬎𐬭𐬀𐬊𐬜𐬀⸱ 𐬰𐬁𐬎𐬎𐬀𐬭𐬆⸱ 𐬛𐬀𐬌𐬌𐬃⸱ 𐬵𐬌𐬙𐬀𐬉𐬌𐬠𐬌𐬌𐬋⸱ 𐬛𐬭𐬎𐬎𐬀𐬙𐬁𐬙𐬆𐬨⸱ 𐬙𐬀𐬥𐬎𐬠𐬌𐬌𐬋⸱ 𐬞𐬊𐬎𐬭𐬎⸱𐬯𐬞𐬀𐬑𐬱𐬙𐬍𐬨⸱ 𐬝𐬠𐬌𐬴𐬌𐬌𐬀𐬧𐬙𐬅𐬨⸱ 𐬞𐬀𐬌𐬙𐬌⸱𐬘𐬀𐬌𐬙𐬍𐬨⸱ 𐬛𐬎𐬱𐬨𐬀𐬌𐬥𐬌𐬌𐬎𐬥𐬅𐬨⸱ 𐬵𐬀𐬚𐬭𐬁⸱𐬥𐬌𐬎𐬎𐬁𐬌𐬙𐬍𐬨⸱ 𐬵𐬀𐬨𐬆𐬭𐬆𐬚𐬀𐬥𐬅𐬨⸱ 𐬀𐬎𐬭𐬎𐬎𐬀𐬚𐬀𐬥𐬅𐬨⸱ 𐬝𐬠𐬌𐬴𐬌𐬌𐬀𐬧𐬙𐬅𐬨⸱𐬾 ¹

𐬀𐬵𐬈⸱ 𐬭𐬀𐬌𐬌𐬀⸱ 𐬓𐬀𐬭𐬆𐬥𐬀𐬢𐬵𐬀𐬗𐬀⸱ 𐬀𐬌𐬣𐬵𐬈⸱ 𐬀𐬨𐬀⸱ 𐬬𐬆𐬭𐬆𐬚𐬭𐬀𐬖𐬥𐬀𐬗𐬀⸱ 𐬀𐬵𐬈⸱ 𐬫𐬀𐬯𐬥𐬀⸱ 𐬫𐬀𐬰𐬀𐬙𐬀𐬥𐬅𐬨⸱ 𐬙𐬆𐬨⸱ 𐬫𐬀𐬰𐬁𐬌⸱ 𐬯𐬎𐬭𐬎𐬥𐬎𐬎𐬀𐬙𐬀⸱ 𐬫𐬀𐬯𐬥𐬀⸱ 𐬯𐬭𐬀𐬊𐬴𐬆𐬨⸱ 𐬀𐬴𐬍𐬨⸱ 𐬰𐬀𐬊𐬚𐬭𐬁𐬠𐬌𐬌𐬋⸱ 𐬀𐬴𐬍𐬨𐬗𐬀⸱ 𐬬𐬀𐬢𐬎𐬵𐬍𐬨⸱ 𐬠𐬆𐬭𐬆𐬰𐬀𐬌𐬙𐬍𐬨⸱ 𐬥𐬀𐬌𐬭𐬍𐬨𐬗𐬀⸱ 𐬯𐬀𐬢𐬵𐬆𐬨⸱ 𐬵𐬎𐬭𐬀𐬊𐬜𐬆𐬨⸱𐬼 ²

𐬁𐬗𐬀⸱𐬥𐬋⸱ 𐬘𐬀𐬨𐬌𐬌𐬁𐬝⸱ 𐬀𐬎𐬎𐬀𐬢𐬵𐬈⸱ 𐬬𐬆𐬭𐬆𐬚𐬭𐬀𐬘𐬃⸱ 𐬯𐬭𐬀𐬊𐬴𐬋⸱ 𐬀𐬴𐬌𐬌𐬋⸱𐬾 ³

𐬯𐬭𐬀𐬊𐬴𐬆𐬨⸱ 𐬀𐬴𐬍𐬨⸱ 𐬫𐬀𐬰𐬀𐬨𐬀𐬌𐬛𐬈⸱𐬼 ⁴

𐬭𐬀𐬙𐬏𐬨⸱ 𐬠𐬆𐬭𐬆𐬰𐬀𐬧𐬙𐬆𐬨⸱ 𐬫𐬀𐬰𐬀𐬨𐬀𐬌𐬛𐬈⸱ 𐬫𐬌𐬨⸱ 𐬀𐬵𐬎𐬭𐬆𐬨⸱ 𐬨𐬀𐬰𐬛𐬅𐬨⸱ 𐬫𐬋⸱ 𐬀𐬴𐬀𐬵𐬈⸱ 𐬀𐬞𐬀𐬥𐬋𐬙𐬆𐬨𐬋⸱ 𐬫𐬋⸱ 𐬀𐬴𐬀𐬵𐬈⸱ 𐬘𐬀𐬖𐬨𐬏𐬱𐬙𐬆𐬨𐬋⸱𐬼 ⁵

𐬬𐬍𐬯𐬞𐬀⸱ 𐬯𐬭𐬀𐬎𐬎𐬃⸱ 𐬰𐬀𐬭𐬀𐬚𐬎𐬱𐬙𐬭𐬌⸱ 𐬫𐬀𐬰𐬀𐬨𐬀𐬌𐬛𐬈⸱𐬼 ⁶

𐬬𐬍𐬯𐬞𐬀𐬗𐬀⸱ 𐬵𐬎𐬎𐬀𐬭𐬱𐬙𐬀⸱ 𐬳𐬌𐬌𐬀𐬊𐬚𐬥𐬀⸱ 𐬫𐬀𐬰𐬀𐬨𐬀𐬌𐬛𐬈⸱ 𐬬𐬀𐬭𐬱𐬙𐬀𐬗𐬀⸱ 𐬬𐬀𐬭𐬆𐬳𐬌𐬌𐬀𐬨𐬥𐬀𐬗𐬀⸱𐬾 ⁷

𐬫𐬈𐬣𐬵𐬉⸱ 𐬵𐬁𐬙𐬅𐬨⸱ 𐬁𐬀𐬝⸱ 𐬫𐬈𐬯𐬥𐬉⸱ 𐬞𐬀𐬌𐬙𐬍⸱ 𐬬𐬀𐬢𐬵𐬋⸱ 𐬨𐬀𐬰𐬛𐬃⸱ 𐬀𐬵𐬎𐬭𐬋⸱ 𐬬𐬀𐬉𐬚𐬁⸱ 𐬀𐬴𐬁𐬝⸱ 𐬵𐬀𐬗𐬁⸱ 𐬫𐬃𐬢𐬵𐬅𐬨𐬗𐬁⸱ 𐬙𐬅𐬯𐬗𐬁⸱ 𐬙𐬃𐬯𐬗𐬁⸱ 𐬫𐬀𐬰𐬀𐬨𐬀𐬌𐬛𐬈⸱𐬾⁸

26.

aδa-nō-tūm sraoṣ̌a aṣ̌iia huraoδa zāuuarə daiiā̊ hitaēibiiō druuatātəm tanubiiō pouru-spaxštīm t̰biṣ̌iiaṇtą̇m paiti-jaitīm dušmainiiuną̇m haθrā-niuuāitīm hamərəθaną̇m auruuaθaną̇m t̰biṣ̌iiaṇtą̇m. ¹

ahe raiia xᵛarənaŋhaca aiŋ́he ama vərəθraγnaca ahe yasna yazataną̇m təm yazāi surunuuata yasna sraoṣ̌əm aṣ̌īm zaoθrābiiō aṣ̌īmca vaŋuhīm bərəzaitīm nairīmca saŋhəm huraoδəm; ²

āca-nō jamiiāt̰ auuaŋhe vərəθrajā̊ sraoṣ̌ō aṣ̌iiō. ³

sraoṣ̌əm aṣ̌īm yazamaide; ⁴

ratūm bərəzaṇtəm yazamaide yim ahurəm mazdą̇m yō aṣ̌ahe apanōtəmō yō aṣ̌ahe jaγmūštəmō; ⁵

vīspa srauuā̊ zaraθuštri yazamaide; ⁶

vīspaca huuaršta š́iiaoθna yazamaide varštaca varəš́iiamnaca. ⁷

yeŋ́hē hātą̇m āat̰ yesnē paitī vaŋhō mazdā̊ ahurō vaēθā aṣ̌āt̰ hacā yā̊ŋhą̇mcā tą̇scā tā̊scā yazamaide.⁸