Translations:Srosh Yasht/50/en
29.
𐬫𐬋𐬌⸱ 𐬬𐬍𐬯𐬞𐬇⸱ 𐬙𐬉⸱ 𐬀𐬞𐬀𐬌𐬌𐬈𐬌𐬧𐬙𐬌⸱ 𐬫𐬅⸱ 𐬀𐬎𐬎𐬈⸱ 𐬞𐬀𐬯𐬐𐬁𐬝⸱ 𐬬𐬌𐬌𐬈𐬌𐬧𐬙𐬌⸱ 𐬥𐬋𐬌𐬝⸱ 𐬀𐬎𐬎𐬈⸱ 𐬞𐬀𐬯𐬐𐬁𐬝⸱ 𐬁𐬟𐬆𐬧𐬙𐬈⸱𐬼 ¹
𐬫𐬋𐬌⸱ 𐬎𐬎𐬀𐬉𐬌𐬠𐬌𐬌𐬀⸱ 𐬯𐬥𐬀𐬌𐬚𐬍𐬲𐬠𐬌𐬌𐬀⸱ 𐬟𐬭𐬁𐬌𐬌𐬀𐬙𐬀𐬌𐬌𐬈𐬌𐬧𐬙𐬌⸱ 𐬬𐬀𐬰𐬆𐬨𐬥𐬀⸱ 𐬫𐬌𐬨⸱ 𐬬𐬊𐬵𐬏𐬨⸱ 𐬯𐬭𐬀𐬊𐬴𐬆𐬨⸱ 𐬀𐬴𐬍𐬨⸱ 𐬫𐬀𐬝𐬗𐬌𐬝⸱ 𐬎𐬴𐬀𐬯𐬙𐬀𐬌𐬭𐬈⸱ 𐬵𐬌𐬧𐬛𐬎𐬎𐬋⸱ 𐬁𐬔𐬆𐬎𐬭𐬎𐬎𐬀𐬌𐬌𐬈𐬌𐬙𐬈⸱ 𐬫𐬀𐬝𐬗𐬌𐬝⸱ 𐬛𐬀𐬊𐬴𐬀𐬙𐬀𐬌𐬭𐬈⸱ 𐬥𐬌𐬖𐬥𐬈⸱𐬾 ²
𐬀𐬵𐬈⸱ 𐬭𐬀𐬌𐬌𐬀⸱ 𐬓𐬀𐬭𐬆𐬥𐬀𐬢𐬵𐬀𐬗𐬀⸱ 𐬀𐬌𐬣𐬵𐬈⸱ 𐬀𐬨𐬀⸱ 𐬬𐬆𐬭𐬆𐬚𐬭𐬀𐬖𐬥𐬀𐬗𐬀⸱ 𐬀𐬵𐬈⸱ 𐬫𐬀𐬯𐬥𐬀⸱ 𐬫𐬀𐬰𐬀𐬙𐬀𐬥𐬅𐬨⸱ 𐬙𐬆𐬨⸱ 𐬫𐬀𐬰𐬁𐬌⸱ 𐬯𐬎𐬭𐬎𐬥𐬎𐬎𐬀𐬙𐬀⸱ 𐬫𐬀𐬯𐬥𐬀⸱ 𐬯𐬭𐬀𐬊𐬴𐬆𐬨⸱ 𐬀𐬴𐬍𐬨⸱ 𐬰𐬀𐬊𐬚𐬭𐬁𐬠𐬌𐬌𐬋⸱ 𐬀𐬴𐬍𐬨𐬗𐬀⸱ 𐬬𐬀𐬢𐬎𐬵𐬍𐬨⸱ 𐬠𐬆𐬭𐬆𐬰𐬀𐬌𐬙𐬍𐬨⸱ 𐬥𐬀𐬌𐬭𐬍𐬨𐬗𐬀⸱ 𐬯𐬀𐬢𐬵𐬆𐬨⸱ 𐬵𐬎𐬭𐬀𐬊𐬜𐬆𐬨⸱𐬼 ³
𐬁𐬗𐬀⸱𐬥𐬋⸱ 𐬘𐬀𐬨𐬌𐬌𐬁𐬝⸱ 𐬀𐬎𐬎𐬀𐬢𐬵𐬈⸱ 𐬬𐬆𐬭𐬆𐬚𐬭𐬀𐬘𐬃⸱ 𐬯𐬭𐬀𐬊𐬴𐬋⸱ 𐬀𐬴𐬌𐬌𐬋⸱𐬾 ⁴
𐬯𐬭𐬀𐬊𐬴𐬆𐬨⸱ 𐬀𐬴𐬍𐬨⸱ 𐬫𐬀𐬰𐬀𐬨𐬀𐬌𐬛𐬈⸱𐬼 ⁵
𐬭𐬀𐬙𐬏𐬨⸱ 𐬠𐬆𐬭𐬆𐬰𐬀𐬧𐬙𐬆𐬨⸱ 𐬫𐬀𐬰𐬀𐬨𐬀𐬌𐬛𐬈⸱ 𐬫𐬌𐬨⸱ 𐬀𐬵𐬎𐬭𐬆𐬨⸱ 𐬨𐬀𐬰𐬛𐬅𐬨⸱ 𐬫𐬋⸱ 𐬀𐬴𐬀𐬵𐬈⸱ 𐬀𐬞𐬀𐬥𐬋𐬙𐬆𐬨𐬋⸱ 𐬫𐬋⸱ 𐬀𐬴𐬀𐬵𐬈⸱ 𐬘𐬀𐬖𐬨𐬏𐬱𐬙𐬆𐬨𐬋⸱𐬼 ⁶
𐬬𐬍𐬯𐬞𐬀⸱ 𐬯𐬭𐬀𐬎𐬎𐬃⸱ 𐬰𐬀𐬭𐬀𐬚𐬎𐬱𐬙𐬭𐬌⸱ 𐬫𐬀𐬰𐬀𐬨𐬀𐬌𐬛𐬈⸱𐬼 ⁷
𐬬𐬍𐬯𐬞𐬀𐬗𐬀⸱ 𐬵𐬎𐬎𐬀𐬭𐬱𐬙𐬀⸱ 𐬳𐬌𐬌𐬀𐬊𐬚𐬥𐬀⸱ 𐬫𐬀𐬰𐬀𐬨𐬀𐬌𐬛𐬈⸱ 𐬬𐬀𐬭𐬱𐬙𐬀𐬗𐬀⸱ 𐬬𐬀𐬭𐬆𐬳𐬌𐬌𐬀𐬨𐬥𐬀𐬗𐬀⸱𐬾 ⁸
𐬫𐬈𐬣𐬵𐬉⸱ 𐬵𐬁𐬙𐬅𐬨⸱ 𐬁𐬀𐬝⸱ 𐬫𐬈𐬯𐬥𐬉⸱ 𐬞𐬀𐬌𐬙𐬍⸱ 𐬬𐬀𐬢𐬵𐬋⸱ 𐬨𐬀𐬰𐬛𐬃⸱ 𐬀𐬵𐬎𐬭𐬋⸱ 𐬬𐬀𐬉𐬚𐬁⸱ 𐬀𐬴𐬁𐬝⸱ 𐬵𐬀𐬗𐬁⸱ 𐬫𐬃𐬢𐬵𐬅𐬨𐬗𐬁⸱ 𐬙𐬅𐬯𐬗𐬁⸱ 𐬙𐬃𐬯𐬗𐬁⸱ 𐬫𐬀𐬰𐬀𐬨𐬀𐬌𐬛𐬈⸱𐬾⁹
29.
yōi vīspə̄ tē apaiieiṇti yą̇ auue paskāt̰ viieiṇti nōit̰ auue paskāt̰ āfəṇte; ¹
yōi uuaēibiia snaiθīžbiia frāiiataiieiṇti vazəmna yim vohūm sraoṣ̌əm aṣ̌īm yat̰cit̰ uṣ̌astaire hiṇduuō āgəuruuaiieite yat̰cit̰ daoṣ̌ataire niγne. ²
ahe raiia xᵛarənaŋhaca aiŋ́he ama vərəθraγnaca ahe yasna yazataną̇m təm yazāi surunuuata yasna sraoṣ̌əm aṣ̌īm zaoθrābiiō aṣ̌īmca vaŋuhīm bərəzaitīm nairīmca saŋhəm huraoδəm; ³
āca-nō jamiiāt̰ auuaŋhe vərəθrajā̊ sraoṣ̌ō aṣ̌iiō. ⁴
sraoṣ̌əm aṣ̌īm yazamaide; ⁵
ratūm bərəzaṇtəm yazamaide yim ahurəm mazdą̇m yō aṣ̌ahe apanōtəmō yō aṣ̌ahe jaγmūštəmō; ⁶
vīspa srauuā̊ zaraθuštri yazamaide; ⁷
vīspaca huuaršta š́iiaoθna yazamaide varštaca varəš́iiamnaca. ⁸
yeŋ́hē hātą̇m āat̰ yesnē paitī vaŋhō mazdā̊ ahurō vaēθā aṣ̌āt̰ hacā yā̊ŋhą̇mcā tą̇scā tā̊scā yazamaide.⁹